2009-7-18 22:36
Charles
「一條龍石澗」王母瀑布 2009/07/18
因為預測星期日會打風兼狂風暴雨，所以趁星期六個風未到，又有酷熱天氣警告，短探大城支澗 - 一條龍石澗。
每次行大城石澗都會被中途的一條大瀑布所吸引，就係王母瀑布，亦係一條龍石澗起點。我地由虎蹤徑上，直插入大城石澗中游。在到「肥佬麥」之間約一半路程就見王母瀑。因為酷熱天氣警告，所以已經大汗疊細汗，一於在瀑下清潭沖個涼，洗下衫，飲下檸檬茶，食下西瓜。消暑過後，立即上攀王母瀑。雖然遠睇王母瀑都好高好斜，不過手腳位甚多，只要小心D，都只係有驚無險。上完第一道高後有一深潭，都係理想大休點，不過我地剛休完，所以無停繼續上。直係一瀑跟一瀑，在短短距離爬昇左140米，每當回望都覺自己在危崖之上。越過最後一瀑，見水勢開始平緩，所以都係玩一玩水，捉下魚蝦。因為未知上游仲有幾耐要行，所以不敢久留。
上游開始水小澗窄，進入廢村地帶，知到離出澗位不遠。最後接回山徑落「肥佬麥」。落山時開始見有幾多人上山，包括「週六」山隊。下午兩點幾出返荃灣，在楊屋道運動場沖涼後天色開始轉陰，未到4點已經落出大雨，相信下午上山的人都會中招。