哈囉~強 » 哈囉~比賽 » 維港V162 2018/3/30-31


2018-5-15 21:56 jojo
維港V162 2018/3/30-31

完了GARMIN100K, 考慮遲遲未決定的叧一個新辦的賽事, 是FOOD ANGEL RUNNER搞, 也是今季最後一個賽事想玩- V162, 長途報名人數不多, 但日賽就情況理想. 自己友, 當然要捧捧場. 賽前大會搞左幾多宣傳, 搜羅各區特色美食做食物清單. 昂平有齋; 大澳茶稞; 城門糯米糍; 川龍點心, 河背老婆餅; 鞍山有雞粥; 界咸有糖水, 油塘有蛋卷, 大風坳有涼茶; 陽明腸粉,香港仔有魚蛋米….. 好吸引囉.

病魔還是離不開我. 剛落場前一星期, 逆100做SUPPORT都唔多妥, 只是陪行十幾K就走, 改為定點. 睇左兩次醫生都未好, 臨落場仲失聲. 變左做鵝公喉, 好睬還是唔好睬, 只是得把聲唔妥, 身體其他機能運作正常. 無借口唔落場.

L0 CP – L5CP
6鬆已到起點, 30人報名,25人上線, 預了今日熱, 7時起步, 最好就是唔塞人.
用自己舒服PACING.  地塘仔上鳯凰山, 開始感受到熱力. 林生一直在後. 快的一早跑走了. 第一個L1 CP 果然有齋, 食左串, 環金腰帶到市集, 迷左一陣.  接回正路去觀音山, 越來越熱, 牙鷹山一帶沒有樹陰, 好在我都習慣熱食. 到大澳L3食左個茶稞, 又飲又食又拎, 坦克哥為我市集開路(大澳居民出沒小心), 順利到東澳古道. 平路古道CLICK 一CLICK P左K, 小腿抽一抽…. 踏一踏地又JOG 番. 4K就到深屈L4 CP, 沒多逗留, 跑10K 出東涌, 追多個參賽者. 到東涌, 截到明珠姐, 又食麵, 又抖, 起左步行去地鐵, 以為自己沒帶八達通+CASH, 嚇死. 耽誤左陣, 到地鐵站買左爭先手卷. 遲左班車.
7HRS03完了大嶼段.

N0-N1
到荔景過N0 CP, 一路上斜, 尾隨見明珠姐背影. 到長源路公厠, 她去方便, 我就過左了. 到城門休息食手卷, 見到馬來西亞選手休息. 見他都爆爆地. 他走先, 我食過手卷+糯米糍才有力上針山. 到重叠位, 一個指示轉落火炭, 一個是直去. 但沒理由咁快落火炭先. 仲要兜大欖一圈. 果然, 見馬來選手由火炭那邊上來. 行錯路, 一起再行時, 迎面玩N 80公里賽選手過, 佢地早上起步, 下午就是落火炭段是正常.
.
N2-N3
落到城門灰橋, 第一次行湖洋山古道, 好在還是黃昏時段,仲有光, 欣賞下古道, 到林道N2 CP 已6PM, 討了CP 的飯食. 拿了頭燈出來, 過川龍N3 CP 已黑齊. 一到CP就見首領. 又爆左. 他行先, 我食點心有蝦餃燒賣+杯面, 有為兄請食提子. 馬來選手話坐多陣, 我起步入山路, 有隻大野豬係前邊打橫街過, 立即嚇一嚇.

N3-N5
一個人黑夜入林, 前邊首領唔知隔幾遠, 後邊唔知馬來選手又有幾遠. 開大個機一了百了. 接麥9, 野豬叫還大聲. 到河背N4 CP , 食老婆餅半個, 又偷人提子食. 起步時剛見馬來選手來, 兜回山徑甲龍去荃錦坳 N5 CP, 己是22:28, 起風呀!  我拎左DROPBAG, 正喎, 有個營可入去更衣. 有熱飯係蒸爐, 正!! 問義工, 林生已經係城門退左賽, 見首領差電, 我諗諗下又唔使差, 做完個大又上路, 坐得耐怕硬晒.

N5-N6
零晨時分, 上大帽超大風又冷, 頭耷耷上近頂又大霧, 抬一抬頭望, 有個人呆坐左斜路上, 眼花嗎? 沒可能這個時間看日出….. 唔理耷頭又行. 唔停得. 落到铅礦坳, 有康哥STEVEN NGAI N6 CP 做義工, 有位義工姐姐好好幫我按摩, 叫EDWINA. 好命, 又剛遇上MIKE 神揸車去CP 送飯, 痴左食, 坐到唔想走, 見首領回魂又趕到.  

N6-N9
首領好人, 陪我一齊起步, 以為火炭N7 CP有雞粥, 原來沒有. 又肚餓, 夜爛人靜跑到富安CIRCLE K, 買左個飯團食, 好難食呀!! 再上路, 果段林唔易爆, 到馬鞍N8 CP, 才有食剩雞粥, 都好啦.  到打瀉油坳, 開始清晨, 第一次落界咸古道, 接到間廟後段記得以前行過這段, 落石級落到腳痛到N9 CP, 又是剩番D 唔多的蕃薯糖水. 坐左陣. 馬來選來到, 他話MISS 左個馬鞍CP找唔到, 找第二條路到界咸.

N9-N10
我同首領起步先. 跑大藍湖的一段石屎路, 接衛徑逆行, 回左魂的首領一點都唔攰, 太陽一出, 開始熱, 上五桂魔鬼山就死. 好在有佢帶路, 油塘N10 CP 改左路, 好荒蕪的地盤位.  見豬媽包左個場SUPPORT, 王子王妃好好服待, 豬馬留左包日清糖水比我倆, 好野!!! 大會話有有蛋卷, 但無晒.

18HRS25完了N0-N10.

N10-H1
CP 離地鐵近1K, 到鰂魚涌, 首領跟標就上斜, 原來MISS 左去鰂魚涌H0 起點報導,上到接衛徑打電話比MATTHEW報告才繼續. 埃近10點才港島起行, 玩日賽的跑手9:00AM 就出發, 所以沒有塞人. 正!!  上個星期首領才逆100, 今個星期100MILES, 見識外星人的威力, 跟本沒感覺, 佢腿仍然很有力. 話自己行拖爆自己, 同我行會舒服D, 但我就被迫平路跑.  到H1 CP 大風坳, 狂風掃落葉, 所剩無幾, 大會話大風坳有涼茶, 但又無涼茶, 烈日當空, 諗起要捱過渣甸畢拉, 扁晒嘴,  KK CHOI 都唔好意思拎私伙朱高力比我. 但食唔落, 好在豬媽有珍貴包糖水比我, 立刻上電.

H1-H2ab
山上,有位H參賽者中暑不適, 有幾位FA 義工圍着, 有位識我問:有沒有哮喘藥. 自己都沒帶上身. 愛莫能助. 捱過兩個山頭, 轉入一條小路落一落去大坑再上回陽明, 中途經油站, 想食野, 但波仔又要等叮, 又沒合心水的蛋糕, 唉..算啦, 去H2a CP先, 有好乾的菠蘿包+雪梨, 照食啦. 都預期沒腸粉食 . 再打埋個紫羅蘭山, 右邊上左邊落, 好快回H2b CP再食些東西上路.

H2b-H3
好熟悉的布力徑, 再轉入港徑逆行, 開心一段平路易行, 但總有上, 及幾多跑得的引水道, 但堅持慢JOG, 經過上香港仔水塘, 微斜都跑, 陽光下水塘好靚, 超過幾多H的跑友到港仔H3 CP, 對魚旦米抱絶望態度. 但義工都好熱心, 有豬骨湯, 又好醎, 坐左陣又做大, 上路, 又要一段引水道後,就上大平山, 感覺速度唔慢, 仍然超過H跑友, 引水道唔跑真好蝕, 一段上斜去山頂紅屋餐廳, 近頂,有個阿叔答訕, 你由大嶼山行來! 我點頭, 他 “哇. 去充軍都得”. 雖然帶病, 但精神幾震奮, 到紅屋沿平路跑到H4a CP

H3-H4ab
到夏力H4a CP這一幕..叧我差點感動到喊, 可能義工見我號碼布, 好驚訝, 我衝完後有些疲憊終於可以坐下來休息一下, 見到MACY 好親切, 又準備粥比我, 又比左包POWER GEL, 有位義工叫YOYO, 一聽到我失聲抱病,咁GE款卻完成了153K 路程, 剩下9K, 她好有感觸, 為我落淚, 我都忍到眼眶都紅, 補給好, 充滿力量, 打埋個山就落, 一直沒有停, 好快就踩完到頂又做大.  沿斜路落再圍圈跑回夏力H4b CP.

H4b-H5
沒多停, 只剩5K路, 同思緩/阿WOOD 離遠同MACY及義工SAY GOODBYE, 感激她們的熱情, 一個箭步跑落斜, 仍見H跑友已跑不動. 一直向終點進發, 尾段有點兒上斜但不覺攰, 天剛黑齊, 要用頭燈落樓梯及有倒樹要挎, 好在試過路, 都知道落晒樓梯要兜落去才可過馬路, 開心見到飛哥坐在路口指示, 他同我自拍左張, 就衝上斜跑落終點完!!! 以為過左36小時, 但大會減去45MINS 車程, 即35:26HRS 完賽. 林生迎接. 成身汗水磨損. 都總算捱完賽. 辛苦但好有回憶.

10HRS完了H0-H5.

30人報名, 25人上線, 10人完成
總名次:5 組別:1

遺憾好多都食唔到主題食物.

2018-5-24 21:38 jojo
相片


頁: [1]
查看完整版本: 維港V162 2018/3/30-31


Powered by Discuz! Archiver 5.0.0  © 2001-2006 Comsenz Inc.