黃子華笑話

迷惘
o係公司，老闆會同我講：
「你番黎唔係訓就係去廁所，你當呢度係屋企呀，呢度係公司呀。」
我番到屋企，阿媽又會話：
「你仲當呢到係你屋企咩，你番黎唔係霸住個廁所就係剩係識得訓！」
「咁...咁我番屋企又唔訓覺又唔去廁所，
番公司又唔去廁所唔訓，
咁我呢Ｄ野去邊到做呀？」
不過後黎我諗過自己又係過份Ｄ既，
於是我就痛改前非，以後番屋企我就剩係訓覺，
番公司就剩係去廁所。

打架
我唔同人打架既。
真係，我咁大個人，從來冇同人打過架。
因為我不嬲覺得，如果你同人打架，
o個個人一睇落去就好打過你，咁無理由咁笨。
咁如果o個個人睇落去已經唔夠你打，
而佢都要同你打，咁佢梗係有秘密武器啦。

紅館
依家做歌星，好犀利，因為有紅磡體育館。
因為呢樣野，做歌星，可以o係一晚，就賺晒你地朝九晚五一世人都搵唔到既錢！
Ｄ人話，我真係唔明張國榮點解要退休，佢一晚已經搵左你一世搵既野，佢一晚已經做左你一世人要做既野，仲有乜野可以做？
唔退休做乜？
做五場。已經輪迴五次！
做三十場，輪迴三十次，如來佛祖都話：駛唔駛？
Ｄ人話，唔係既，佢唔捨得退休既！佢最後o個場演唱會，佢自己都喊。
佢係喊，不過唔係為自己喊，係為左你地喊呀：
「我就退休ｌａ，我聽日就唔駛DO o勒。你地聽日仲要番九點，唔好遲到呀！」
　

狗
各位，如果你有養狗，你不妨細心觀察一下。
無論你隻狗有幾開心，o係開心既背後，佢永遠有一層更深既哀愁。
o個份哀愁，就係來自當你放工番到屋企既時候，佢唔能夠同你講：
「唔好換衫，出街食飯，我請！」