連續幾星期週末都係落雨,今個星期都唔例外,預測星期六有雨,星期日仲係雷雨添,所以都係行翻星期六。
今次係Tommy、Daimen、Edmund、JoJo同我走石芽北脊,不過起步前山頭上都幾黑,仲落過一陣雨。本來都有 Plan B 可以改路線,但去到大水坑暫時無雨,所以繼續行程。如常由梅子林公廁後面山路上,過竹林隧道時見個地幾乾。在樹帶內不斷爬升,在走出樹帶時追上一伙人,大約都係五個人,但亦在此時下出雨來。繼續向上,雨越落越大,又係兩分鐘內全濕;身在雲端,視野只有不到50米,唯有跟住路徑走
,但兩邊草長,先是及腰高,然後及頸高,最後係完全沒頂,加上橫風橫雨,感覺就如在海中掙扎,最後要潛水。
撥草而上,睇唔到山勢,跌跌撞撞地走完石芽,但遠處雷聲不斷,近處風雨飄搖,有寒冷感覺
,都好少夏天行有咁嘅feel。聽到雷聲,上黃牛山後不敢停留,立即轉向落打瀉油坳,又係非常濕滑。接回麥徑至鬆一口氣,續走「萬里長城」、基維爾、飛鵝山、沙田坳。竹園換衫、下午茶,檢查傷勢,只係手指爆些少缸,手臂多幾條花痕,總無穿無難。
P.S. 連續4個星期在山上玩水,今次又係行完至嚟好天