後記由Charles 寫:face35先睇圖片:

本來復活節假期諗住去北京玩，點知機票一早滿晒，唯有短短地上廣州兩日。
廣州係兒時經常去的地方，近年都有間中去行o下，知道來回交通都好方便，所以無訂房、車票，就大搖大擺過關。諗住假期第三日，人潮應該無咁多，點知都失預算，要遲一粒鐘至在深圳上到火車。點幾鐘到廣州，見售票處無咩人買車票，又諗住回程班次好密，唔想買o左票之後要趕車，所以都無預售回程。

搭地鐵去黃沙站，行過沙面搵旅館。因為廣州亞運關係，現在廣州週圍好多建設同番新工程，所以都好混亂。行到去白天鵝賓館斜對面，以往住過果間旅館，發覺亦正進行番新（繼續營業）。好在隔籬有另一間已番新好，雖然貴少少（268元/日），但勝在整潔。放低行李就出去搵飯食，行過第十甫路，上、下九里步行街、海印區運動城、戶外用品一條行、北京路步行街，最後返第十甫路陶陶居飲夜茶。飯飽後仍可出珠江睇夜景，行足一日。

第二日早，去蓮香樓飲茶，然後返旅館交房。出去再砌過，先沿珠江畔過愛群大廈，睇o下D舊建築（其實廣州仲有好多戰建築），轉上一德路（海味街、玩具街），最後去埋天河書城。見時間尚早，就返蓮香樓晚飯，點知客滿，唯有過返陶陶居食小菜晚飯，跟住過南信食碗雙皮奶。多逛一陣就搭地鐵去火車站，攸閒的旅程就此結束，跟住就係走難般的回程。

九點幾去到火車站，見排隊買票都幾多人，不過仲有約十班車，估計都不成間題。點知未排到去就已經話所有票已經賣晒，想搭巴士但又唔知邊度搭，週圍問人。好彩問到個警察，佢話會有加班車，所以就繼續等，總算過一關。火車22:58開，00:09至到深圳，已經封關，唯有跟大隊搭的士過黃崗都等o左半粒鐘，總算又去得到。到黃崗見到好塞車，好多人（人人都集中在這裡過關），等o左都有半粒鐘過關（只係黃崗呢邊算快啦），又過一關。1:18買到過境巴士車票，總算安心，不過仲要在落馬洲落車過關再上車，最後一關。車到荃灣轉的士返屋企，凌晨兩點幾。

幾好喎, 只是最尾趕到好以走難咁啫...  

係失o左D預算，總萛平安返來。

最近又發現好多大陸食店用坑渠油, 仲毒過山埃, 上到去一定唔敢食油多既野

除了食之外, 係咪無乜景點呢? 影得幾個地方

我o地都主要係食蒸的，炸物就無，煎既都有，盡量少油啦。
因為時間緊逼，其實都無去甚麼景點，主要行老街、步行街。本來都有plan去越秀公園，最後都去唔到。

去廣州主要睇d 舊建築, 老街道. 景點查實無咩. 況且得兩日時間. 都行到八八九九. 如果有多一日,可以考慮埋番禺, 廣州火車可直達番禺.
可能d 坑渠油尚未發作. 我倆仲健在

我姨媽好耐以前係廣州教書，細個成日同媽咪探佢，飲茶食點心最開心仲要以前（二十年前）無坑渠油
我明明食左宵夜，一番睇你地Ｄ相，依家又好肚餓啦你地．．．蝦人ge你叫我點讀書