【明報專訊】龔如心遺產爭產案已經喺高等法院揭開戰幔，而維港對岸嘅華懋戲院，今個月30號晚就會變身華懋廣場劇院，上演《一生唯一至愛》木偶劇；華懋中人話，呢套木偶劇係前老闆小甜甜同黃德輝嘅愛情故事。華懋遲下仲會開間小甜甜博物館。
木偶劇嘅劇照已掛咗喺華懋廣場外牆，主角係小甜甜「如心」同小甜甜丈夫「德輝」。華懋向Emily透露，呢套劇請嚟內地同香港嘅劇團合作，係小甜甜臨終前嘅遺願之一，演期有10日，由4月30號至5月9號，每日有兩場，頭場開7點半，尾場開9點半。票價最平25蚊，最貴都係一舊水。
華懋嘅發言人仲話，喺呢套劇之後，佢哋籌備緊一套動畫，稍後會開一間小甜甜博物館，紀念佢哋嘅老闆。