本來上星期已諗住出車，點知落0左一大陣雨，計劃取消。呢個星期天氣大晴，重裝出車。推住兩架單車由東涌線地鐵直入東涌只係兩個站，好方便。因為路程唔係踩好遠，所以每人只帶500ml水上路，十一點到東涌。
今日第一站重點係機場，沿途經過好有「馬拉」feel的棕櫚海岸，機鐵快線不停在身邊經過，飛機不斷在頭上飛過。望見機場係這麼遠那麼近，唔使一個鐘就推住行李車（單車摺埋放上去）進入客運大樓。在一、二號大樓穿梭，享受完「靈氣」同思樂冰之後施施然離開（所以話唔使帶咁多水，週圍都有野飲）。
返回東涌後第二站係入黃龍坑。踩入去一路都係上斜，唔似入機場咁輕鬆，汗流不斷。去到車路盡頭亦係黃龍、北龍石澗入澗位。因為著住單車鞋，唔方便四圍跳石，所以只係逗留一陣就走。出去時因為係落斜，所以非常爽快。
出到路口轉左，用些少時間去埋東涌炮台就完成埋第三站，三點半出返東涌走人，快來快去。

竟然推單車上地鐵無人理

候機？嘆汽水？應該食$100蚊既大家樂早餐喎

入黃龍坑, 踏埋單車溯澗啦

你地連玩兩日, 唔熱死都攰死啦

嘩！機場D野咁貴，點食呀。只有7仔D思樂冰為持原價。
開頭諗住踩車唔係咁累，點知都流好多汗，又要趕返屋企沖涼趕下場，都無得點「抖」。

第一次渣住架摺車去玩,好過隠 由黃龍坑衝落,快到個心都寒.險些pk
你都買番架兩個轆
玩左兩日,都好似未夠盡

部車買左幾銀?

黃色果部係我ge ，買0左五年左右，當時買約$5800，現在時值約$8000。另一部係借人0地ge，計埋換0左ge零件，時已過萬有多。

高消費的活動

摺車可以有平有貴。平ge一、二千蚊都有，貴ge去到兩萬幾亦得，豐儉由人，最緊要係肯出去踩車遮，唔係買架車返來睇。

嘩~~你地好鬼型呀，全副裝備WOR

一分錢一分貨,外租單車通常都好重. 今次摺車輕得多. 戶外用的野,大部份都用錢來買重量

初哥第一次玩. 返到工公,同事提我,先知道被個腳踏撞到瘀晒

比個網址大家參考我呢隻牌子單車ge選擇。
http://www.birdybike.com/Models/models.html

d車摺完係咪細好多架, 都無摺後相

上面有張已摺好的單車同機場手推車比例相片
大致可摺三摺(即前後轆內返).仲有個單車袋套住羅出街tim,不過開晒部車推出去,有型好多

都唔係好大架遮。有人上來我屋企都唔覺有兩架單車。

唔係喎, 昨晚路過機場, 至少見到 Spaghetti House 同 Burger King 都好接近市區價喎, 只是無套餐, 都食得過啦.

對於我來講「粉仔屋」同「堡+勁」都係貴0野。對上一次入機場飲「堡+勁」大杯汽都成$16。

蠢左,到機場第一間7仔無思樂冰,就係大快活買了兩杯$8的汽水.都貴啦.後去新翼7仔至有思樂冰買.

實情呢，我覺得香港生活真係一Ｄ都唔平係英國機場禁區前後都有Supermarket，一樣有Mc當奴同Burger King，一樣有套餐
上次的提過，係英國食水果分分鐘平過香港。本土英國蛋中size12蚊港紙一打，意大利Free range都係13蚊，不過半打。我上次睇雜誌見到香港有機蛋要28蚊半打貴到癲
之後睇壹仔，見到有食緣個Ｄ意大利蛋要60蚊？我下次返香港買蛋比你地做手信好過

其實香港係因為無本地土產0野，所有東西都要靠入口。以往都重有大陸平0野，但自從大陸經濟起飛腳，同有食物「A」貨出現之後，唯有依賴外國進口。在代理同進口商挾倉，兼地產商抬高租金(可能係主要完因)托市之後，所有0野都貴晒。

正確Ｄ來講，係「所有食物出現 Ａ貨」

60蚊一隻蛋?半打? 有無係乜牌子
我叫個剛剛去巴黎->羅馬->倫敦旅行的朋友都可以真係買蛋返來做手信喎