今日天文台都幾準,未出發已落咗陣大雨,但一陣又停,所以無理會,照砌!車在大欖隧道前同後都大雨連場,都係嗰句:「未出發先興奮!」
9:30起步,睇情況按計劃都係要走引水道,担住遮都仲可以,但好快都褲腳全濕。雨只係時大時細,過一陣腳又乾番。
去到吉慶橋,在亭內避雨的都仲有其他行山人。10:30時間尚早就繞大圈走大欖自然教育徑過清快塘,起行無耐雨勢又轉大,全身盡濕。沿途上斜,雨水從上流下,又在路旁滲出,大欖至清快塘段石屎路頓成大清石澗。
上到高位觀景台反而停雨,順勢而下好快到清快塘路口都只係12點左右,條腳都乾咗五成。Tommy話:「呢道落去深井好快到,但無地方換衫,不如行元荃古道到荃灣有體育館方便好多!」所以大家又繼續行元荃古道。
開始轉入山路,初段還好,但漸漸雨又轉大。好多上山路段,水在沖溝游走形成激流。接近石龍拱時橫風橫雨,因為响雷更加要收起雨遮。在亭內坐咗一陣,迅速脫離落荃灣,1:32完成。
到荃灣,Tommy一定唔少得一碗牛什、一支啤酒。
大欖轉車站 ﹣引水道 ﹣吉慶橋 ﹣大欖自然教育徑 ﹣清快塘 ﹣元荃古道 ﹣荃灣(約17K@4hrs)
ps:本來可以hae行的路段因為連場大雨變成不平凡