由1999年第一次玩毅行者, 之後就差不多每年都有玩, 有隊就毅行, 無隊就偽行啦.
今年工作及家事都好忙, 練習時數少, 兼且1個月之前的雷利衛徑長征都已經行唔完兼仲病病地, 原本都諗住今年唔玩. 不過, 之後, 慢慢間仲跑下, 再跑下, 好似回返一些體能, 不如今年慢慢地去原成哩次偽行者啦.
今年小七, 7個有5, 都有玩. Charles及JoJo入左S31, Daimen亦入了422. Elsa及我則個別偽行.
早一晚OT幾攰, 諗住都2pm起步, 瞓耐d, 但習慣左, 8am都已經一定要起身. 長時間賽, 最怕缺糖, 比賽前有空閒就食食食.
14:00 起步. 見有熟人Kenny, 就跟下隊, 上西灣, 我就跟唔上了, 慢慢上啦, 諗住落先追返. 可惜, 落時都跑唔到落, 遞唔起腳咁, 只可以以快步下山.
17:20 CP1 西灣. 再次見Kenny隊, 佢地差不多休息完., 我就同佢地講唔洗理我喇, 我會自已行, 之後再見唔到佢地. 我在西灣食左半個包+1支野飲, 去到鹹田灣又坐底食左半件三文治+1支野飲. 心諗, 應該係條打底既Tight褲, 太過拉住, 行唔起, 換了跑褲, 之後就行得輕鬆多了.
19:30 CP2 北潭凹, 預備起步, 見到陪Kenny隊行的朋友還在CP2, 原來Kenny只是剛起步不久, 我就逐步逐步上. 前後都唔多人, 可以用自己步伐行, 到嶂上都無買野飲, 又繼續行. 上雞公開始有雨. 在石路行到腳踝痛的FiveTen, 在這裡開始就發揮作用了, 下踤石路及上落雞公都同平時差不多, 過了不少正在小心奕奕的行者.
22:46 CP3 水浪窩. 去看看汽水機, 大把貨, 我買了一支寶礦力, 又食左一個包就離開CP3. 上到偽行補給位置, 有d攰但夠物資, 所以無辛苦地爬上爬落去拿. 上馬鞍山, 全程有快線任我行, 不過真係好焗, 上到頂有些少風, 坐底又咬2口包. 下昂坪要排隊, 但d人群就是聚在昂坪, 之後一路都好順暢, 萬里長城有風, 行得好爽.
03:15 CP4 基維爾. 雖然行泥路唔跣, 但始終用力多左, 開始肚餓, 但又開始唔開胃了. 在CP4只飲了2杯熱飲, 連Power bar都無拿就諗住係沙田坳有熱野食會好d, 不過去到沙田坳都只係食到一碗魚蛋. 好眼瞓, 頂唔住, 去到回歸亭坐係到半睡. 一坐, 原本個亭得10人左右, 之後聚至3~40人, 好嘈, 有d人大叫其隊友起, 真係叫還叫, 唔好叫到我丫. 休息左1個鐘, 先好少少, 再起步.
07:02 CP5 畢架山. 有薑茶同蕃薯糖水, 好正, 可惜只有小小. 好肚餓. 在CP5, 由於中途用多左錢買野食無乜錢剩, 見到JoJo朋友Cadet, 問佢借左$150傍身. 下梯級, 好眼瞓但都仲有些小力, 都OK去到大埔道. 見到有巴士埋站好想上車. 上金山路, 出現幻覺, 以為遇到山友, 已拿起相機影video, 但再睇真d, 原來差好遠...
08:30 CP6 走私坳. 太眼瞓, 無力, 兼且腳踝痛, 再行不但上辛苦, 如果腳踝傷了就玩唔到之後既比賽, 如果今次只是自由行, 如果真係比賽真應該頂耐d. 逃脫.
回家發現相機不見了.
可能是在逃脫時, 在往荃灣出口的小亭休息, 除去滿是泥濘的行山褲及放底隨身物品放在凳上, 有來電, 接收唔咁好, 企左係附近聽.
1. 被坐在附近唯一的呀嬸拿了.
2. 在將物品收入袋時, 睇漏, 無放入.
3. 一般會將相機及電話放左側袋, 之後行時, 拿電話出來跌左
所以今次係最
失敗既
偽行攝影之旅, 除了行唔完之外,連相及片都無, 仲乜鬼攝影之旅丫.
唯有等有無別人的相頂下啦.
