前言:
渣馬過後一星期為應付「Vibram 香港100」操咗一課短線,點知第二日肩胛位痛。初時以為只係一般肌肉疲勞,過一兩日無事,卒之係連咳都覺得痛,星期四要睇醫生攞消炎止痛藥,仲有感冒咳同鼻水一拼處理。食咗消炎藥之後感覺痛楚紓緩,但兩日後就係「香港100」。
比賽日:
又係凌晨四點起身,地鐵、小巴、的士轉接,7:20就到北潭涌。到場所見外藉人士有成一半人,真係咩人都有。因為係一百公里賽事,所以心情同氣氛都唔會好緊張,各人都會按自己目標時間完成。
8:00起步後好快就接入上窰郊遊徑,有小小塞人,但都唔使爭,因為爭得嬴都可能要還。出翻水壩大家就自由地跑,9:29完成11K到達東壩。
SP–CP1: 跟住麥徑走,人龍稍為拉開,可以用自己速度走。到咸田灣即見Yuan同Hermann做人肉路牌指示參賽者,10:58完成21K到CP1,Vicent同Kim就在士多CP內打點,在比賽期間難得地有炒飯食,有Gatorade飲。
CP1–CP2: 咸田過大灣,轉回大浪村走麥徑,經赤徑穿土瓜坪到黃石碼頭。全段最高只係大浪凹,屬於好跑路段。上大浪凹後人流拉疏,跑落山時仲可以執一、兩個人。12:14完成28K到達黃石碼頭。
CP2–CP3: 黃石食咗餐蛋包同埋最順手的蕉,沿馬路接入大灘轉入山路,崎嶇路窄,但參賽者都好禮讓,見你跑得快都會比你過頭。因為驚再拗柴,所以全程山路都只係顧住睇路,都無睇沿途風景。13:28完成36K到達海下。
CP3–CP4: 見到剝皮橙、瑞士卷,仲有可樂,正呀!海下沿馬路上白沙澳轉入南山洞,入山路上蛇石凹,爬升不多,前後已不太多人,但總有一、兩個在纏擾。出到榕樹澳仲見到Michael,快快到CP埋站。14:57完成45K到達榕樹澳。
CP4–CP5: 因為個胃頂住,見到食物都唔想食,只係食蕉。開始上山接回麥徑,但覺肌肉開始硬化。到石坑坳時立即食埋最後1包gel,再慢慢捱上雞公山,所以一路落後於JoJo。落水浪窩路段係「拗柴」聖地,但都照跑,只係有啲位唔搏咁啫,16:17完成52K到達企嶺下。因為今次target係20hr內,所以前半段需要9hr內完成,亦已達標,在11hr內完成後半段就會比較有把握。
CP5–CP6: 企嶺下可以有自己的support,但都先要去廁所減壓至可以食得落壺粥,仲食多碗麵。帶多3包gel、兩條bar繼續上路。上馬鞍山呢一段真係死去活來,好驚會抽起。頂到上馬鞍凹,跟住跑落昂平、茅坪就爽好多,可以鬆吓對腳,間中仲追到幾個人。去到打瀉油坳天色好暗要開電筒,17:12完成65K到達基維爾。
CP6–CP7: 逗留有10分鐘,食過碗麵,補給汽水、朱古力後再上路。沿麥徑走無驚無險,落到沙田坳無毅行般的熱鬧,靜靜地走上獅子山,前後都無咩人,上畢架時大腿都幾緊。21:07完成73K到達畢架山check point。以往偽行都唔會停畢架山,但今次就站站停食嘢,呢度又食多個麵,而且秏水量都幾大。
CP7 - CP8: 畢架落山大級一啲都唔敢快跑,始終都要留貨。落到平地泥路,10'年毅行無得跑,11'年毅行無得跑,依家卒之可以跑,21:49到大埔道。金山路上斜都幾眼訓,可能係開始血糖下降跡象。過走私坳到城門都係用比較慳力的速度,因為成對腳都累,但只要用均速就可以keep住行。一路上我都覺得最困惑的係唔知check point放在邊,海下係、榕樹澳係、基維爾係、城門係,甚至乎終點都係,可能係我無做足玏課。出到城門燒烤場唔見燈火就估到在壩頭,約22:45完成83K到達城門水塘check point。
CP8 - CP9: 呢個CP主要都只係食蕉,其他都唔係好食得落,依然係要加可樂救急用。針草大帽可以話係我地後花園,短操時只覺係短短的16K,但到現在就變成「他媽的16K」。趁個身未凍就要再起步,22:50再動身。上針山係預計中的慢速,但上到頂也只不過係要35分鐘左右算是不錯。穿針過草都仲可以執到幾個人,00:33完成90K到達鉛礦凹。
CP9 - finish: 呢度已再食唔落碗麵,唯有香蕉、朱古力同可樂。逗留超10min,再向香港的盡頭出發。一路都無睇表,以為已係01:50,所以同JoJo講盡力而為,未必做到20內,但JoJo話:「依家都未夠1點,點會做唔到呀!」自己恍然大悟。進入大霧區,即使係熟悉麥徑,有時也走了點冤枉路。不需一小時到達四方山涼亭,趁機食朱古力飲可樂來應付奪命斜路。捱完之後接入車路,開始進入假睡狀態,只係咪著眼跟路中心白線走,但行行吓竟然將路邊石膞當成中線,一腳踼埋去立即扑街
,當堂醒一醒。02:03到達大帽頂,同JoJo講:「呢度跑埋落去就19內完成。」大家二話不說就開始跑,因為實在太大霧,只有沿著路中心白線跑,都不能跑得太快,因為轉彎會跑過龍。過閘口之後知到所餘無幾,一路上都仲繼續執人,慢慢接近扶輪公園,幾乎搵唔到終點入口,最後順利衝線,18hr33min完成100K,是個人在100公里賽事的最佳時間,PB了。
P.S. 衝線過後雖然興奮,但已無胃口食預備好的杯麵同薯片,只係快快換厚衣服,搭穿梭巴士離開 — 在車上昏睡了。