遲來的後記,本來都唔打算再寫,但又想留個記錄可以番查。
今年本來都有D火,正好驗証操練得來的成果。但比賽天氣預告係19-24度,有陽光..........今次濕熱喇。一早食飯,仲有3個雞尾包,但起步前發覺消化情況並不好,心知不妙。因為預咗熱爆,同埋一定唔可以好似上年咁受傷,所以今年無咩爭勝心,一句講晒 — 唔搏!
起步年年一樣幾千人湧出去,臨入郊遊徑前都仲在JoJo後面,但一入郊遊徑就唔知佢躡咗去邊。因為早兩日落過雨,所以小路好跣,自己就在擠塞的人龍裡安靜地等,但人潮就在兩邊的山路插上。以往自己在這段山路都仲可以慢行,今次就咁企吓行吓都無咗十分鐘。就係呢十分鐘,往後要花好大精力去越過前面幾百人
。
好不容易離開郊遊徑,落赤徑段都係跑得比較保守,被免過熱。直至上大浪凹就開始過人,以往呢段路、呢個速度只係跟,但過唔到人,但今次都過好多,即係呢一堆都係在郊遊徑上躡到位的慢腳
。
大浪凹多謝 Daimen support 一支水
,轉上蚺蛇凹。呢段路先至睇清前面D人,見D人前面有位都唔跑就驚一驚,點解會落後咁多,仲跟在呢堆人後面。上蚺蛇路面較闊又再過人,開始見到認識的面容,芬姐、Kennis、Pearl,事後睇想至所有認識的人在蚺蛇坳之前都走在我前面。蚺蛇出長咀係最小心的一段,但有時想快都唔得,不時被人堆阻路,自己又唔搏,要等闊位至過得,一路直至長咀都係咁,臨長咀前追到小強。
回程過東灣總算阻力無咁大,不過大腿肌自毅行之後都係有D緊,所以都係留一留,一路拍住WinWin(不過人地早一日至玩完50K)。東灣同大灣沙灘段終於可以放開跑,落咸田 Daimen support 一支可樂,過西灣追到群山的楚瓊。上吹筒坳的一段斜路好多人都會抽,所以都係唔好急。上到頂之後出西灣亭的路就較易處理,見平路就跑。到西灣亭check point都要去一去廁所,出來才第一次睇表,完來已經4個鐘,估計都要4個半鐘至返到去,似乎背囊無望,但都唔好咁肉酸,盡力跑埋佢。尾後呢5、6K好爽。一路跑都一路諗:或者今年比較熱,所有人D時間都會慢D,背囊都可能仲有機會。一個動力驅使,於是一路執人執到番終點,名次406都仲有背囊。事後得知都好多人慢過上年,今年hae小小都仲執得番個背囊,成功。