哈囉~強


 
標題: 焦急毅行2014 - 意想不到的開局,意料之中的結局 14-15/11/2014
Charles
百公里大地主
Rank: 8Rank: 8


UID 307
精華 0
積分 1632
帖子 1632
閱讀權限 150
註冊 2007-7-30
狀態 離線
發表於 2014-11-27 14:32  資料 文集 短消息 
焦急毅行2014 - 意想不到的開局,意料之中的結局 14-15/11/2014

毅行由抽簽開始,因為super組別淨位不多(很多位已被各大社團、強隊及富貴隊mark咗),所以要upgrade就一定要正簽中選。上年同JoJo都無中簽,所以鼓勵JoJo入公司隊入super組,但仍失敗而回。今年自己中簽,就拍住JoJo,另加Ramos及Billy兩個已攞Super Cert的朋友組隊。

隊中自己實力「似乎」最弱,所以操練亦從中簽後展開。經過一整年的身體調節,抗熱能力已有改善,所以今年夏天亦多操了長課。九月同JoJo去了西藏旅遊,回來時感覺到氣與力的提升(唔通真係高原訓練),仲要減磅5kg。所以即時同JoJo操一課雙坳,雖然不算好快,但感覺良好,就這樣準備迎接毅行前的預賽—雷利。

雷利開得不錯,但因為鞋的問題令到水泡很早出現,再加上急趕好性,卒之大爆收場。雖然雷利失敗,但復完後的操練,及麥徑後50一課証明能力比2012年強,所以同JoJo講,從來無懷疑18內的保證。

比賽當日,天陰,溫度又適中,到起點北潭涌一切順利,等的就係起步一刻。起步好順,以從未試過的速度1小時去到東壩尾,仲要感覺輕鬆,信心大增。去到CP2比預期快10分鐘,但仍提醒自己誡急放慢,仲不時要食小食補充。但好景不常,到第3段Billy出現狀況,落山仲PK埋,各隊員夾手夾腳幫忙落到CP3。補給過後,雖然時間落後,但上第4段都要放慢。未到馬鞍坳,Billy再要坐低,好彩得Ramos的味精粉回魂。去到CP4雖然meet到17hr30min的時間,但都無停(連有咩食都唔知)。出到飛鵝山道,JoJo先跑落去廁所,我跟住落到沙田坳見到Bernice同Adrian觀戰,呢度我哋無support,但見到熟人都係好高興。見JoJo買汽水飲,本來都想買,但兩個隊友又到,又要起步。

沙田坳無support好處是唔使頂住個肚上山,但壞處係未到畢架見肚餓。同JoJo講到CP5要慢少少食啲嘢,立即遭遇凌勵bearing眼神,好在都搶到杯薑茶同一個梨食。跑落大埔道support只係半小時的空間本無大礙,但跑到半路又肚餓,身邊食物又食晒,頂到support點大吃一餐。點知食突咗立即頂住,唯有慢慢行上金山CP6。過到城門有大文豪開始陪跑,但胃悶情況依然,索性在大壩嘔出來,舒服了點。但針山不是裝飾品,上針要力,但又無嘢到肚,所以時間慢咗。落到針腳,就索性叫JoJo拖繩,一路上草山仲過咗啲人。

到CP7諗住淨飲湯麵的味精水,但再坐一會就咩水都嘔翻晒出來,但感覺又舒服些。上大霧,仍要JoJo拖一段,但上不多遠已可甩拖,不知那來的力量追著JoJo直上大霧頂。因為風大,未有等隊友,在大霧頂直衝落CP8,還把JoJo甩在後頭。10分鐘內其他隊員陸續到達,趕著落Tommy的support點,但仍然吃不下東西,費了Tommy的一番功夫,不過帶來的補給小包就好有用。停不多久,多帶一支可樂,繼續最後的拼搏。

從大霧頂跑落山已感到HOKA鞋的好處,進入第9段仍可以操山的時間到達CP9,還過了好些隊伍,但對做18內仍沒有十足把握,Daimen在此脫離在尾段石屎路等。水塘路都主要慢jog,在預定時間內出石屎路,只要無狀況出現,時間已十拿九穏。過SCP後進入一段山路,後再轉回石屎路,心情變得輕鬆,上斜還可慢jog。快到漁農管理站,Billy嚷著腳痛跑不動,JoJo又出拖繩,Ramos哄著,連埋Daimen四個人前後左右挾持Billy繼續跑。到燒烤場,Daimen已先走一步在終點等候,入閘後數著一彎又一彎,終點前一百米抛下身上所有負重,17小時31分衝線。

98年到現在17年間只正式落場毅行4次,由最慢慢的47hr35min到現在18內,卒之成為「焦急毅行者」,感謝一切支援。
頂部
 


當前時區 GMT+8, 現在時間是 2018-6-22 21:25

  本論壇支付平台由支付寶提供
攜手打造安全誠信的交易社區 Powered by Discuz! 5.0.0  © 2001-2006 Comsenz Inc.
Processed in 0.022614 second(s), 6 queries

清除 Cookies - 聯繫我們 - 哈囉~強 - Archiver - WAP