又係雙鹿，上星期有雨去唔到，呢個星期再炒；好在大家捧場，都有六個人到。
今朝坐着架「萬金油」92加上塞車，要成10:10至入到西貢，東洋山仲有大片雨雲。小強已成化石，好在西灣小巴即時有車，落車後即時擁落西灣。穿越「老年成」塊田之後正式入澗。
第一站四疊潭已經擠擁，多數係沙灘客上來玩水，不過都要落水浸一番。
第二站鳴幽瀑水溫已較四疊潭清涼，又玩一陣兼食西瓜。有人一早發出「逃走」預警，忽然間又灑一場雨，正當Tommy慨嘆：「唔通個天都要幫XX」之時，天又轉晴。大隊繼續再上，逃走的繼續逃走，仲要帶人走。小七只得四人繼續，先過藏幽瀑，接上石棧道，點知「石棧道、無料到」，安全通過。
再上尚有幾處潭瀑，不過都無停留。但到奔槽瀑再遇「逃走」隊員，原來隊員由出口位再入澗。大家再在奔槽瀑浸一浸冰水降溫至走人。
徹離時Tommy爆出今日金句：「行快D喇，D啤酒蟲咬啦」

最後果張相,個天藍都好似假
話時話,是否合成ge

唔係合成，只係Canon機的色彩比較「矯」。

棧道好危險呀 我係行唔過既

「肺話」!嚴禁賴三賴四。

欠對好鞋o者. 十月有支助,好買啦!!  出年來來回回要訓練!

嘩,你地去過好多地方呀,我都未去過,我都鍾意露營,不過唔係去過好多次,一年只可以去兩次,有時會同一地點再去,咁就唔係好多地方去過

我都鍾意露營, 不過哩度唔多人鍾意露營, 所以好少去

睇你地好有心機,影埋靚相,仲詳細說明,仲有你地好好腳骨力,比我就無咁好喇我呢d有得睇,無得玩都好開心thank you

其實有時我o地都好hae，至在吹水，行10K就走人去開tea。