連續三日假期，加上秋風起，正係操山時候。
今次無咩特別，純綷操長線，無幾多選擇，只係衛徑定麥徑。上次操完衛徑，所以今次就麥徑六七八九十。大埔道起步，第六段無咩難度，輕鬆完成。接上針山先覺今朝食的o野未消化，所以上得幾慢。上草山時都仲可以，但上大帽時感覺有乳酸聚集。跑落大帽時右小腿想抽，不過控制住。在荃錦坳飲o左兩罐汽水，食o左個麵包，總算回魂。
第九段因為補給完，時間做得幾好。到大欖涌水塘路同引水道，邊行邊跑，但到尾後更加無氣力跑太多。完成時手臂、手指、小腿、大腿都有痺痛現象，不能站立太耐。落到屯門市廣場，到七仔飲思樂冰，情況舒援；再到food court食碗大麵之後，當堂無事。
事後檢討，到最後階段係出現三低現象：低水、低糖、低炭，以至手腳痺痛。

大埔道9:31 - 第七段起步10:22 - 針山頂11:02 - 草山頂11:49 - 第八段起步12:07 - 四方山12:56 - 大帽頂13:18 - 荃錦坳13:47 - 第九段起步14:07 - 大欖涌水塘15:20 - 完成水塘路16:18 - 198出口17:14

41K : 7hr43min

耗水量：3L

可唔可以咁計呢
六至十 就用咗 8小時
咁.... 一至十段  咪 16小時就可以..

咁理想就好.   麥徑尾該20k可以跑. 頭該50k 行死人家..

點計一至十段都係under20啦

under 20?!談何容易。有full support，唔使負重，唔影相／video，都仲有D機會。你有幾可見過D super會拍video呀；有幾可見佢o地揹咁多o野上身呀！

比對番07年10月19日操同一段山，時間都係一樣，即係無進步。要有特破都唔係咁易。

今年練咁少都keep到時間, 唔野少啦

今年唔算操得少（燒烤就好似操少o左），只係狀態好瓢忽，每次都唔知開邊瓣。