一早約好復活節露營,最終攪咗8個人來,都從未試過咁墟撼。
1點荃灣街市買齊晚餐材料,然後小強一車載晒所有背囊,其餘人搭車。因為長假關係,扶輪公園營地爆滿,荃錦坳營地都要等到4點至有位。大家迅速起營及起壇,由Tommy Oliver主理,薑蔥炒蟹、豉油皇炒大蝦、豉椒炒蟶子、西蘭花炒龍躉球、香草烤羊架、金沙豬肋骨、豬肘骨磨菇長通粉,一一展現在大家眼前同肚入面。飲飽食醉後仲有牌九教室、斜釘學堂、十三張等餘興節目。
最後過扶輪公園睇唔到星,唯有大家早抖(其實已經12點)。
清晨4:46醒咗,大家之前好似有講話睇日出,但週圍無咩動靜;況且咁夜至瞓,唔想擾人清夢,所以同JoJo砌上大帽山。大約5:05由扶輪公園起步,聽聞話5:30日出,所以都幾難趕到。行咗十幾分鐘,天已轉亮,唯有盡人事加速。過咗停車場閘口,轉上之字路,來到望到日出的地方,發覺原來因為有霞氣,太陽要升上較高位才出現,正好被我們趕上,紅雞蛋加上彩霞,美不勝收。
落山洗埋面返營地,大家才剛起身。揸車落川龍端記飲埋茶,才施施然返去收拾,咁至係完滿。
P.S. 因為主力負責煮食,所以晚餐食物相欠奉,需由其他人補充。