今日端午,梗係玩澗游龍舟水,好過去海灘、泳池同人逼。
今日只得3人(因為有啲人真係要去同人逼),粉嶺人齊就行。入到南涌太陽熾熱,雖然有搽防曬,但昨日都有啲曬紅,所以都唔係好自在。入澗見水量不大,一路上行已汗流浹背
,下游見有潭瀑清徹立即落水。好在今日此澗不多人,可以獨佔,清涼感覺,暑氣全消。因為水量小,所以大部份路段都可在澗石上行走,所以連屏南石棧道都skip咗,好快就到中段位,亦都有啲郊遊人仕嬉水。
接上游段,好快行到雙瀑潭,又係全身濕晒,要落水降溫,冰涼透心,加上西瓜大邊,一樂也。再到上游出澗位,最後一潭,浸多一陣。離澗時Tommy話時間尚早,不如加料落丹竹坑走,所以加3.75K向龜頭嶺、平頂坳進發。梯級爬升近200m,大家又變回一個水人,好在天陰至無咁熱。一路上其實都有响雷,點知上到平頂坳仲落出雨嚟,好彩已經係wet look,話知佢紅雨。到落丹竹坑時又出番太陽,熱氣即時蒸上來。最後1:37行完南涌郊遊徑,出粉嶺tea。
PS: 全日先流汗,後浸水,再流汗,又淋雨,又再流汗,件衫都未乾過,水戰打足全場。